EAJ-PNV-K SALATU DU BILDU-K OSINBELTZEKO ZABORTEGIAREN ERREALITATEA EZKUTATU DUELA ETA LEGEA URRATU DUELA

Batzarkide-talde jeltzaleak eskatu du lehenbailehen Ingurumeneko eta Lurralde Antolaketako foru diputatu Iñaki Errazkinek izen bereko batzordean parte hartzeko eta, bertan, hondakinen azpiegituren gaineko Lurraldearen Arloko Planaren aldaketa proposamena aurkezteko.

Behin Gipuzkoako Foru Aldundiak proposatutako hondakinen azpiegituren gaineko Lurraldearen Arloko Planaren aldaketa ezagututa, EAJ-PNVk salatu du Bilduk Osinbeltzeko zabortegiaren errealitatea ezkutatu duela eta legea urratu duela.

Batzarkide-talde jeltzalearen bozeramaile Markel Olanok azaldu du, Foru Aldundiaren txostenak berak diola Bilduk proposatzen duen Osinbeltzeko zabortegiak akuiferoak kutxatzeko aukera handiak dituela, izan ere, harrobia iragazkorra da. Hori dela eta jeltzaleek Iñaki Errazkin foru diputatuari honakoa eskatu diote: “Adarra ez jotzeko ez zestoarrei, ez gipuzkoarrei, eta behingoz egia esateko: alegia, Osinbeltzeko zabortegia ez dela zabor bizigabeak hartzeko, baizik eta zabortegi kutsakorra dela”.

Era berean, Olanok Bilduren Gipuzkoako hondakinen kudeaketa iluna eta gardentasun eza salatu ditu: “Berriro ere, Bilduk kudeaketa iluna egin du. Izan ere, ez du Gipuzkoako Aldizkari Ofizialean argitaratu Lurralde Arloko Plana aldatzeko txostena, Osinbeltzeko harrobiaren erabilera aldatzeko . Beraz, Bilduren aginteko foru gobernuak bizkar eman die Gipuzkoako Batzar Nagusiei eta gipuzkoarrei eta, gainera, legea urratu du, izan ere, Foru Aldundiaren web orrian iragarki txiki bat jarri du eta, horrenbestez, herritarrek 30 egun dituzte aldaketa proposamenari zuzenketak aurkezteko, hain zuzen ere, hondakinen azpiegituren gaineko Lurraldearen Arloko Planaren aldaketa proposamenari”.

EAJ-PNVren bozeramaileak, halaber, segidakoa salatu du: “Bilduk egin nahi duena legea urratzen du. Izan ere, Lurraldearen Arloko Plana aldatu nahi du, Foru Araua ukitu gabe, hain zuzen ere, PIGRUG hondakin plangintza arautzen duen 7/2008 Foru Araua”. Horren harira, Markel Olanok gogorarazi du, Lurraldearen Arloko Plana dekretu bat dela eta Foru Araua baino ierarkia gutxiagoko araua dela eta, beraz, plana aldatzeko Foru Araua aldatu behar da. Baina aitzitik, Bilduk ez du ierarkia hori errespetatu nahi eta, hori, ilegala da. Izan ere, Errazkinek bere borondatea nagusitu nahi du eta ez du kontuan hartu nahi Batzar Nagusien gehiengoaren erabakia”.

Azkenik, hona hemen Olanoren hitzak: “Hori guztia dela –eta, EAJ-PNVren batzarkide-taldeak eskatu du Ingurumeneko eta Lurralde Antolaketako foru diputatu Iñaki Errazkin izen bereko batzordean parte hartzeko eta, bertan, hondakinen azpiegituren gaineko Lurraldearen Arloko Planaren aldaketa proposamena aurkezteko”.