XABIER EZEIZABARRENA: “BILDUREN HONDAKINEN EREDUA EZ DA ERABATEKOA ETA ERRAUSTE PLANTA EZ EGITEA DU HELBURU”.

EAJ-PNVren batzarkidearen iritziz, “Foru Aldundiaren gobernuak arauak ez ditu aintzat hartzen eta, beraz, ez du legitimitaterik. Gainera, demokrazian zerbait gustuko ez dutenean ez dute betetzen eta, hori, onartezina da; hau da, ganberari nahiz herritarrei errespetua galdu die”.

Hondakinei buruzko batzordearen lehenengo saioan, batzarkide taldeek euren iritziak eman dituzte. EAJ-PNVren batzarkide Xabier Ezezabarrenak honakoa azpimarratu du: “Planak indarrean dagoen araudia urratzen du eta, beraz, gizarte-desobedientziari dei egiten dio”. Ezeizabarrenaren aburuz, “Foru Aldundiak zero zabor paradigma saldu nahian jarraitzen du, nahiz eta birziklatu nahiz konpostatu ezin daitekeena zabortegietara botatzeko bilduko duten eta, ondorioz, usainak zein ingurumen-eragin larria egoten jarraituko da”.  

Ildo beretik, jeltzaleen batzarkideak Foru Aldundiaren eredu aldaketa izan du hizpide: “Azkeneko asteetan irizpide aldaketa egon da; hain zuzen, zaborra beste herri batzuetara eramatetik lur-azpian sartzera pasa dira. Hori Euskadin ezinezkoa da, izan ere Ingurumen Legeak ez du onartzen zaborra degradatutako natur-guneetara eramatea, Bilduren Aginteko Foru Aldundiak nahi duen bezala. Gainera, eredua malgua dela esaten dute, baina ez dute aipatzen zeintzuk diren hondakin-hondarrak jasoko dituzten herriak, ez zer gertatuko den Gipuzkoan hondakinak botatzeko guneak amaitzen direnean. Gogoan izan, hondar horiek biologia-jarduera izaten jarraitzen dutela eta, beraz, kutsatzen nahiz usaina sortzen dutela”.  

Era berean, Xabier Ezeizabarrenaren ustez, “lehengo astean aurkeztu ziguten dokumentuan aipatzen denez, zaborra gutxiago sortzen da, baina ez dute kontuan hartu krisialdiaren ondorioz dela”. Hortaz, Ezeizabarrenak segidakoa esan du: “Planaren prognosian ezin dute esan zabor gutxiago sortzen dugula hainbat herritan atez ateko bilketa sistema ezarri delako; krisia edo zaborra beste herrietara eramaten dela izkutatu nahi dute”.

Bestalde, EAJ-PNVren hautetsiak kritikatu du, prebentzioan Gipuzkoako Hiri Hondakinak Kudeatzeko Plangintza Orokorrak (PIGRUG) Foru Aldundiaren plana baino haratago doala eta, besteak beste, ez dituela hondakin-uren araztegiak kontuan hartzen, eta hauek ez dira egun batetik bestera desagertuko”.   

Erakunde bakoitzari dagokion eskumenei buruz ere mintzatu da Xabier Ezeizabarrena: “Euskadin Ingurumen Lege Orokorra dago eta, bertan, Lurralde Historiko bakoitzeko erakundeei dagozkien eskumenak aipatzen dira. Hori guztia ere ez zaie interesatzen eta, beraz, demokraziaren saltoki gunean daudela dirudi; hots, interesatzen zaidana hartzen dut eta beste guztia apalan uzten dut”. Honenbestez, batzarkide jeltzalearen ustez, “Hondakinen Partzuergoaren eginbeharra – partzuergoaren beraren estatutuetan hala dago idatzita – PIGRUG-en jasotakoa kudeatzea da eta, horren artean, errausketa-instalazioaren eraikuntza eta hondakinen balorizazio energetikoa daude”. Hau da, EAJ-PNVren hautetsiaren iritziz, “Juan Carlos Alduntzin foru diputatuak Partzuergoaren eginbeharra ez du aintzat hartzen eta, gainera, Batzar Nagusiei eskumenak kendu nahi dizkie eta, beraz, ganberari zein herritarrei errespetua galdu die”.  

Halaber, Xabier Ezeizabarrenak Foru Aldundiaren iritziari buruz hitz egin du: “Bilduren aginteko Foru Aldundiaren arrazoiak errauste-planta kutsakorra dela izaten jarraitzen dute, nahiz eta plantak ebaluazio zorrotzenak pasa dituen”. Ildo beretik, jeltzaleak Alduntzini gogoratu dionez, “eraiki nahi dituzuen plantak kaltegarriak izan daitezke eta hiri nahiz ingurumen-eraginaren plangintza behar dute”.

Hori guztia dela eta, Ezeizabarrenak honakoa esan du: “Alduntzin foru diputatuak uneoro araudiaren aurkako hitzaldia egiten du eta, beraz,  politika-legitimitatea galdu du eta Ezker Abertzaleak Epaitegi Gorenari beti kritikatu izan diona egiten ari da: legea euren modura manipulatzen du errausketa-instalazioa ez egiteko. Hori oso larria da eta asko kezkatzen gaitu”. Honenbestez, EAJ-PNVren hautetsiak segidakoa azpimarratu du: “Bilduren eredua ez da erabatekoa. Birziklapenak eta errauste-plantak, bakoitza bere aldetik, ez diote irtenbidea ematen hondakinen arazoari, bai, ordea, elkarrekin”.