EAJ-PNV-REN IRITZIZ, BILDUK JARRERA ANTIDEMOKRATIKOA DU, IZAN ERE OZTOPOAK JARTZEN ARI DA ALDUNTZIN DIPUTATUAREN AURKAKO ZENTSURA-MOZIOA EZTABAIDATZEKO

Jeltzaleen batzarkide taldearen bozeramaile Markel Olanoren ustez, “Bilduk Gipuzkoako Batzar Nagusietako Araudiaren irakurketa okerra egin du, zentsura-mozioa proposatu duten hiru taldeetako bozeramaileen parte-hartzea ukatzeko. Horrenbestez, hiru bozeramaileek ezingo dute azaldu bakoitzaren zentsura-mozioa aurkezteko arrazoiak”.  

EAJ-PNV batzarkide taldeak gaur arratsaldean salatu du, Bilduk Gipuzkoako Batzar Nagusietako Mahaian eta Bozeramaile Batzordean zegoen adostasuna apurtu duela. Adostutakoa honakoa zen: Ingurumeneko eta Lurralde Antolaketa foru diputatuaren aurkako zentsura-mozioa aurkeztu duten hiru bozeramaileen parte-hartzea onartzea.

Jeltzaleen batzarkide taldearen bozeramaile Markel Olanoren aburuz, “Bildu oztopatzen ari da Juan Carlos Alduntzin diputatuaren aurkako zentsura-mozioaren eztabaida. Koalizioak berak Gipuzkoako Batzar Nagusietako Araudiraren irakurketa okerra egin du, zentsura-mozioaren talde proposatzaileen bozeramaileek mozioa aurkezteko arrazoiak azaltzeko aukera ez izateko”.

Ildo beretik, Olanok Bilduren inposizio-jarrera salatu du: “Osoko bilkuraren gidoiaren aldaketa behartu du; izan ere, Araudiaren 173.artikuluaren irakurketa okerra egin du. Artikulu horrek honakoa dio: Zentsura-mozioa izenpetu duten hamabost batzarkideetako batek mozioa defendatuko du, gehienez 90 minutuz. Hala ere, nahita ahaztu dute araudi berberaren 63.3 artikulua, non eta txanda bera batera erabiltzeko aukera dagoela esaten den”.

Honenbestez, EAJ-PNVren eledunak segidakoa esan du: “Mahaiak zein Bozeramaileen Batzordeak nahiz talde politikoek hiru taldeek txanda bera batera erabiliko zutelaren jakinaren gainean zeuden. Alabaina, Bilduk akordioa apurtu du eta, ondorioz, Araudian ezarritako joku-arauak eta Batzar Nagusietako ohiko jarduera”.  

Markel Olanok, halaber, Batzar Nagusietan orain arte izandako lan egiteko era gogoratu du: “Orain arte Ganberaren Araudiaren irakurketa malgua egin dugu, parte-hartzea eta hitza izateko eskubidea bermatzeko. Hortaz, Aralar taldeak Bakearen gaineko talde txostengilean bi ordezkari ditu – Rebeka Ubera eta EH Bildu nahiz Gipuzkoako Aralar alderdiaren koordinadore Ernesto Merino – batzarkide bakarra izanagatik. Are gehiago: taldeek ez dute eragozpenik jarri, nahiz eta aukera hori Araudian ez dagoen”. 

Hori dela eta, Olanok Bilduren jarrera kritikatu du: “Araudia nori eragiten dion, halako irakurketa egiten dute. Beraz, Bilduren jarrera antidemokratikoaren beste adibide bat da”.

Azkenik, EAJ-PNV batzarkide taldearen bozeramailearen iritziz, “Bilduk osoko bilkurako gidoia inposatu digu eta, hori, oso larria da. Horrenbestez, eztabaida oztopatu dute eta Alduntzin foru diputatuaren aurkako zentsura-mozioa aurkeztu dugun taldeon bozeramaileok ezingo ditugu gure arrazoiak azaldu”.