XABIER EZEIZABARRENA: “BILDUK EZ DU ERRESPETATZEN ZABORTEGIAK IXTEKO ETA BERRIAK EZ IREKITZEKO EUROPAREN AGINDUA”.

EAJ-PNVren batzarkideak koalizioari honakoa gogoratu dio: “arau hierarkia dago. Beraz, hirukote toxikoari buruz hitz egiten duzue, baina benetan toxikoa eta kutsakorra dena segidakoa da: indarrean dagoen foru araua aintzat ez hartzea eta zuen eredua inposatzea Batzar Nagusien gehienaren kontra”.

Bi egun barru Juan Carlos Alduntzin Ingurumeneko eta Lurralde Antolaketako foru diputatuaren aurkako zentsura-mozioa eztabaidatuko dute Batzar Nagusietan. Hala ere, gaurko osoko bilkuran taldeek hondakinen gainean hitz egin dute. Europako Parlamentuak baliabideen erabilera eraginkorra egiteko deiari buruzko ebazpen-proposamena aurkeztu dute Aralar eta Bildu taldeek eta, hain zuzen, horrek piztu du berriro eztabaida.

EAJ-PNVren batzarkide Xabier Ezeizabarrenak Bildu eta Aralar taldeek proposamena aurkeztu izana kritikatu du: “Hondakinei buruzko gai bakarreko batzordean ez zuten ezta mozio bakar bat ere aurkeztu. Gainera, arazoaren zatikako ikuspegia dute; izan ere, errauketa-instalazioaren aurkako argudioak ematen dituzte eta taldeei zein ganberari errespetua galdu diete, hirukote toxikoa delako hitzak erabiltzen dituztelako”.

Honenbestez, Ezeizabarrenak EAJ-PNVren lana babestu du: “Hirukote toxiko horren buruak, EAJ-PNVk alegia, ez ditu gauzak hain gaizki egin eta datuek hala diote: Beasainen, adibidez, bostgarren edukiontzia jarri zenetik birziklatze-tasa %50 handitu da”. Hortaz, jeltzaleen hautetsiak Bilduri eskatu dio, “horrelako hitzak erabiltzeari uzteko”.

Era berean, EAJ-PNVren batzarkideak koalizio abertzaleari dei egin dio, “gaiak ez nahasteko, Gipuzkoan hondakinen gaineko Bibliako doktrinarik ez egiteko, eta Ingurumeneko eta Lurralde Antolaketako foru diputatuaren aurkako zentsura-mozioa lasai hartzeko, izan ere, demokraziaren tresnetako bat da”.

Xabier Ezeizabarrenak, halaber, segidakoa gogoratu du: “Bete beharreko arau hierarkia bat dago. Baldin eta arau horietako bat aldatu nahi baduzue, legitimitatea duzue, gehiengorik ez, ordea. Hori dela eta, Europako Parlamentuko ebazpen bat erabiltzen dute araudia ez betetzeko, baina ebazpen hori ez da Batzar Nagusiek onartutako foru arau bat baino garrantzitsuagoa. Hau da, gustuko ez duzuenez eta, are gehiago, beste batzuek onartu dutenez, ez duzue aintzat hartzen”.

Azkenik, Ezeizabarrenak Bilduri eskatu dio, “eufemismoak baztertzeko. Ezin duzue esan hondakinen gaineko dokumentua foru arauaren garapena dela eta, bitartean, araua hankaz gora jarri. Lege-iruzurra egin nahi duzue eta, ondorioz, argi uzten duzue zuen hierarkia errausketa-instalazioa ezabatzea dela”.