EAJ-PNV-REN IRITZIZ, FORU ALDUNDIAK HERRI KONTUEN EUSKAL EPAITEGIAREN TXOSTENAREN IRAKURKETA ARDURAGABEA EGIN DU

Eider Mendoza jeltzaleak salatu du, Bilduren aginteko Foru Aldundiak ez duela konfiantzarik teknikarien lanarengan.
2010.urteari dagokion Gipuzkoako Lurralde Historikoaren Kontu Orokorra onartzen duen Foru Araua atzera bota dute Gipuzkoako Batzar Nagusiek gaurko osoko bilkuran. Eider Mendoza EAJ-PNVren batzarkidearen iritziz, “Foru Aldundiaren jarrera gai honetan oso kezkagarria da. Izan ere, alderdikeriaz aritu da Herri Kontuen Euskal Epaitegiaren txostenaren irakurketa egiteko”. Horren harira, Mendozak honakoa azaldu du: “Foru Aldundiak HKEE-ren txostena aitzakitzat erabili du lehengo foru gobernuaren ospea zalantzan jartzeko. Txostenean esaten ez diren gauzak erabili ditu eta hori irakurketa arduragabea egitea da”.

Horrenbestez, batzarkide jeltzalearen ustez, “2010eko bilkuraldian zintzo egin genuen lan. Hartu genituen erabakiak beste taldeei azaldu genizkien eta, besteak beste, ekonomia sustatzeko plana egin genuen. Beste gauza bat da erabaki horrekin ados ez egotea eta, orain, ezer ere ez egitea ekonomia sustatzeko”. Hortaz, Eider Mendozak Foru Aldundiari eskatu dio, “inbertsio gehiago egiteko, izan ere, ez dugu ikusi krisiari aurre egiteko neurririk hartzen ari denik”.

Bidegiren auziaren gainean, Mendozak segidakoa esan du: “Ez zen desbiderapenik egon, aldaketak baizik eta, betiere, teknikarien iritzian eta irizpide juridikoetan oinarrituak. Hala ere, jarrera gardena izan genuen eta azalpen guztiak Batzar Nagusietan eman genituen. Gainera, Bidegin alderdi guztiak ordezkatuak zeuden, informazio guztia eman zitzaien eta gaiak aho batez onartu ziren”.

Halaber, hautetsi jeltzaleak Bilduren aginteko Foru Aldundiaren jarrera aldaketa salatu du, izan ere, 2009 eta 2010eko Herri Kontuen Euskal Epaitegiaren txostenen irakurketa ezberdina egin du, nahiz eta txostenak gauza bera esaten zuen: “2009an Foru Aldundiak txostenari zuzenketak proposatu zizkion eta, beraz, EAJ-PNVren aginteko Foru Aldundiaren lana babestu zuen. 2010ean, ordea, HKEE-ren txostenak gauza bera esaten zuen, baina Bilduren aginteko Foru Aldundiak ez zuen zuzenketarik egin, nahiz eta teknikarien iritzia bestelakoa izan. Hau da, Foru Aldundiak ez du konfiantzarik teknikarien lanarengan”.

Azkenik, Eider Mendozak Larraitz Ugarte Foru Aldundiaren bozeramailearen jarrera kritikatu du: “Ugarte andreak etorkizuna aurrez ezagutzeko abilezia erakutsi du eta, beraz, 2011n Herri Kontuen Euskal Epaitegiak zer esango duen asmatzen hasi da. Hori arduragabekeria da. Dirudienez, Ugarte foru diputatuari solik axola dio lehengo foru gobernuaren izen ona zalantzan jartzea eta, hori, oso larria da”.