EAJ-PNV-K SALATU DU, FORU ALDUNDIAK UDALEKIN EGINDAKO LANA ETEN DUELA, EGOITZEN ESKUMENEN ALDAKETARAKO

Eider Mendoza jeltzaleak kritikatu du, Bilduren aginteko Foru Aldundiak bertan behera utzi duela aldundiaren eta udalen arteko egoitzen gaineko negoziatzeko batzordea.

Gizarte Politikako foru diputatu Ander Rodriguez Gipuzkoako Batzar Nagusietan agertu da eta Gizarte Zerbitzuei buruzko 12/2008 Legeak markatzen duen eskumenen doiketari ekiteko proposamena aurkeztu du. EAJ-PNVren batzarkide Eider Mendozak honakoa esan du agerraldiaren amaieran: “Ez dugu ulertzen zergatik Bilduk bertan behera utzi duen udalen eta Foru Aldundiaren arteko egoitzen gaineko negoziazio batzordea”. Ildo beretik, Mendozaren ustez, “udalak zuzeneko solaskide izatetik entzuleak izatera pasa dira; izan ere, ezin izan diote ekarpenik egin proposamenari”.

Era berean, Eider Mendozak segidakoa azpimarratu du: “Baldin eta Foru Aldundiak proposamena udalekin elkarlanean egin izan balu, orain aldundiak benetako egoeraren eta ekonomia-balorazioaren diagnosia izango zuen”.

Halaber, Gizarte Politikako foru diputatuak esan duenez, udal-egoitzetako langileen lan-baldintzak mantendu ahal izango dira. Horren harira, EAJ-PNVren hautetsiak kezka adierazi du: “Egun, udal-egoitzetako langileen baldintzen artean egoera ezberdinak daude, beraz, zaila izango da Foru Aldundiaren langileak izatera pasatzen direnean hain lan-baldintza ezberdinak izatea, lan bera egiteagatik”. 

Azkenik, Eider Mendozak Ander Rodriguez Gizarte Politikako foru diputatuari eskatu dio, egindako proposamenari batzarkide taldeei ekarpenak egiten uzteko eta, orobat, plan horretan udal guztien parte-hartzea bermatzeko, udal bakoitzean agintea duen alderdia zein-nahi den ere”.