EAJ-PNV-K BILDURI ESKATU DIO, LEGEALDI OSORAKO EKONOMIA ETA ENPLEGUA SUSTATZEKO PLANA LEHENBAILEHEN EGITEKO.

Jeltzaleen batzarkide taldearen bozeramaile Markel Olanok bat egin du Iñigo Urkullu lehendakariak proposatutako Enplegua Sustatzeko Programarekin, eta Bilduren aginteko Foru Aldundiari esan dio, Gipuzkoak Enplegua Sustatzeko Programa berezia behar duela. 

Ekonomia eta enplegua bultzatzeko talde txostengilean parte hartu ondoren, Gipuzkoako Batzar Nagusietako batzarkide taldeak beraien ekarpenak egiten ari zaizkio talde txostengileari. EAJ-PNV batzarkide taldearen bozeramaile Markel Olanok honakoa gogoratu du: “Bi urte pasa dira Martin Garitano Gipuzkoako Diputatu Nagusi izendatua izan zenetik eta, oraindik, ez du krisiari aurre egiteko planik egin. Iñigo Urkullu lehendakari izendatua izan zenetik, ordea, ez dira ehun egun bete eta, dagoeneko, legealdi osorako Enplegua Sustatzeko Programa egin du eta, gainera, hainbat neurri zehatz hartu ditu krisiari aurre egiteko”. Hori dela eta, Olanok Garitanori eskatu dio, legealdi osorako ekonomia eta enplegua sustatzeko plana lehenbailehen egiteko, eta Eusko Jaurlaritzarekin elkarlanean aritzeko, izan ere, erakundeen arteko elkarlana ezinbestekoa da krisialdia gainditzeko.

Horren harira, EAJ-PNV batzarkide taldearen bozeramailearen ustez, Foru Aldundiaren aurrekontuan adostutako 7,6 milioi euroko aurrekontu-sailak ez du balio izango Gipuzkoaren egoera larriari aurre egiteko. Horrenbestez, Markel Olanok segidakoa azpimarratu du: “Gipuzkoak eta gipuzkoarrok gehiago merezi eta behar dugu. Hori dela eta, EAJ-PNVren batzarkide taldea ados dago Iñigo Urkullu lehendakariak proposatutako Enplegua Sustatzeko Programarekin eta Bilduri eskatzen dio, Gipuzkoarentzako Enplegua Sustatzeko Programa berezia egin dezan”.

Era berean, Olanok salatu du Bilduren aginteko Foru Aldundiaren ekimen falta: “Gipuzkoak lidergo sendoa behar du krisiari aurre egiteko, eta diputatu nagusiak izan behar du lidergo horren burua. Aitzitik baina, Martin Garitanok ez du krisiari aurre egiteko planik egin nahi – bere ustez, ez du ezertarako balio –, nahiz eta Gipuzkoako Batzar Nagusien gehiengoak behin eta berriz plana egiteko eskatu dioten”.

Horregatik guztiagatik, Markel Olano jeltzaleak gogoratu du, EAJ-PNVk krisiari aurre egiteko proposamena lantzen jarraitzen duela: “Izan ere, Bilduren aginteko Foru Aldundiak argi utzi du ez dituela Batzar Nagusien gehiengoaren eskariak aintzat hartuko. Hori kontuan hartuta, Foru Araua egitea da oposizioari gelditzen zaion tresna bakarra Gipuzkoako Foru Aldundia krisiaren aurkako plana egitera behartzeko”. Horrenbestez, Olanok esan du, egun, EAJ-PNV ekonomiaren eta gizartearen eragileekin Ekonomia Sustatzeko Foru Araua egiteko proposamena aztertzen ari dela”.

EAJ-PNVren proposamena talde txostengileari

Halaber, EAJ-PNVren eledunak zehaztu du, 7,6 milioi euroko aurrekontu-sailaren erabilpenerako bere taldearen proposamena: “EAJ-PNVren iritziz, lehenik, enpresen lehiakortasuna handitu behar da eta, batez ere, enpresa txiki eta ertainei garrantzia eman behar zaie. Horretarako, Ikerketa, Garapena eta Berrikuntza garatu behar dira. Era berean, Produktu berriak Gipuzkoatik kanpo merkaturatzeko eta enpresa berriak sortzeko laguntzak eman behar dira; baita partaidetzako antolakuntza eredu berriak eta enpresen lankidetza sustatzeko laguntzak ere. Eta, azkenik, lana aurkitzeko zailtasun handiak dituzten pertsonen lan-merkaturatzea bermatzeko neurriak hartu behar dira”.

Amaitzeko, Markel Olano jeltzalearen azpimarratu ditu, talde txostengilean parte hartu duten ekonomiaren eta gizartearen eragileen ekarpenak. Olanoren aburuz, zerbait argi geratu bada honakoa da: “7,6 milioi euroko aurrekontu-saila eskasa da bizi dugun egoera larriari aurre egiteko. Beraz, talde txostengilearen lana benetan aprobetxatu nahi badugu, guztion artean, elkarlanean, legealdi osorako plangintza berezia egin behar dugu”.