EAJ-PNV-REN IRITZIZ, BILDUREN AGINTEKO FORU ALDUNDIAK EZ DU ETORKIZUNEKO PLANIK ZAHARREN EGOITZEN LEKU-KOPURUAREN GAINEAN

Eider Mendoza batzarkide jeltzaleak Gizarte Politikako foru diputatu Ander Rodriguezi eskatu dio, Batzar Nagusiek agindutakoa zein legealdiaren hasieran hartutako konpromisoak betetzeko eta, gainera, ekimen berriak egiteko eguneko zentroen zein zaharren egoitzen arreta zerbitzua hobetzeko.

Gizarte Politikako foru diputatu Ander Rodriguez Batzar Nagusietan agertu da eta, bertan, batzarkide taldeen gehiengoak adostutako ekimenen betetzearen berri eman du; hain zuzen, zaharren egoitzen leku-kopurua handitzeko konpromisoari buruz, itxaron zerrendak gutxitzeari buruz eta zaharren egoitza berriak irekitzeari buruz.

EAJ-PNVren batzarkide Eider Mendozak salatu du, beste behin, Bilduren aginteko Foru Aldundiak 5,2 milioi euroko murrizketa egin duela Gizarte Politikako departamentuan eta, era berean, Ander Rodriguez foru diputatuak ez duela borondaterik izan Elgoibar, Irun eta Usurbilgo zaharren egoitzak eraikitzen jarraitzeko”.  

Horren harira, Mendozak honakoa gogoratu du: “Krisialdia izan da, batez ere, itxaron zerrendak gutxitu izanaren arrazoia – hain zuzen, 367 pertsonek uko egin diote leku bati eta, horrek, arduratzen gaitu –. Hau da, gure adinekoek nahiago dute etxean gelditu senide batek lagunduta, edo etxez etxeko laguntza jaso”.

Halaber, batzarkide jeltzalearen ustez, Bilduren aginteko Foru Aldundiak lehengo legealdian hasitako lana egiten jarraitu du. EAJ-PNVk hasitako lan horri esker, egun, zaharren egoitzetako zein eguneko zentroetako leku-kopurua handitu da eta, era berean, itxaron zerrendak gutxitu dira. Gainera, EAJ-PNVren aginteko Foru Aldundiaren Gizarte Politika departamentuak hasitako proiektuek – hain zuzen ere, Irungo, Elgoibarko eta Usurbilgo zaharren egoitzak – egun ematen den zerbitzua hobetuko lukete; Bilduk, ordea, ez du borondaterik eta ez ditu proiektu horiek garatuko, nahiz eta Batzar Nagusien gehiengoa proiektu horiekin ados dagoen.

Era berean, Mendozak segidakoa azpimarratu du: “Kezkatuta gaude Gizarte Politikako foru diputatuak aurkeztutako hausnarketa eskasa delako. Ez du ekimenik egin ez Batzar Nagusiek adostutakoarekin betetzeko, ez legealdian zehar hartutako konpromisoak betetzeko eta, ondorioz, zerbitzuak hobetzeko eta handitzeko”.

Azkenik, EAJ-PNVren hautetsiaren iritziz, “Gizarte Politikako departamentua noraezean dago; izan ere, ez da gai izan konpontzeko zaharren egoitzetako itxaron zerrenden arazoa eta, gainera, ez du borondaterik Batzar Nagusiek adostutakoa betetzeko”.