2 de julio de 2013

EAJ-PNV-K SALATU DU LARRAITZ UGARTE FORU DIPUTATUAREN KUDEAKETA KAXKARRA ERREPIDEETAKO DEPARTAMENTUAN



Aintzane Oiarbide jeltzaleak Mugikortasun eta Bide-Azpiegituretako foru diputatuari eskatu dio, errepideak finantzatzeko proposamena aurkezteko behingoz. 



Mugikortasun eta Bide-Azpiegituretako foru diputatu Larraitz Ugartek eta Nafarroako Gobernuko Sustapen kontseilari Luis Zarraluquik bilera egin zuten atzo. Bertan, besteak beste, errepideen finantziazioari buruz hitz egin zuten. EAJ-PNVren batzarkide Aintzane Oiarbideren ustez, agerian gelditu da, beste behin ere, Bilduren aginteko Foru Aldundiaren kudeaketa kaos bat dela, eta honakoa eskatu dio: “Aurkezteko, behingoz, errepideak finantzatzeko duen proposamena – baldin eta proposamenik badu – eta, gainera, proposamena Batzar Nagusietako gainerako alderdi politikoekin adosteko”.

Era berean, EAJ-PNVren batzarkideak Bilduri egotzi dio hainbat alditan bidesarien gaineko iritzia aldatu izana: “Hasieran, Bilduk ‘peajerik ez’ goiburua erabili zuen, besteak beste, Etxegaraten atzerriko kamioilarientzat bidesaririk ez jartzeko. Ondoren, 2012ko martxoaren 15ean Bilduren aginteko Foru Aldundiak esan zuen, gipuzkoarrok gaitasun handiko errepideetan bidesariak ordaindu beharko genituztela. Eta, azkenik, Mugikortasuneko eta Bide Azpiegituretako foru diputatuak berak iragarri du, ardku elektronikoak ezarriko dituela gaitasun handiko errepideetan bidesaria kobratzeko. Hala ere, egun, foru diputatuak ez du argitu, besteak beste, nortzuk ordaindu beharko duten, zenbat ordaindu beharko den eta sistema arrakastatsua izateko teknika- eta kontrol-zehaztapenak”.

Ildo beretik, Oiarbidek segidakoa esan du: “Egun, Bide-Azpiegituretako foru diputatuak ez die bere proposamena idatziz aurkeztu gainerako alderdi politikoen ordezkariei. Proposamen horretan foru diputatuak honakoak zehaztu beharko ditu: Gipuzkoako errepideak finantzatzeko planaren helburuak, egitekoak eta ekonomia- eta finantza-azterketak”. Horrenbestez, batzarkide jeltzaleak salatu du, Larraitz Ugarte foru diputatuaren kudeaketa kaos bat dela eta aldez aurretik pentsatu gabeko erabakiak hartzen dituela. Ondorioz, orain arteko errepideen gaineko adostasun guztiak apurtu ditu. Are gehiago: “Gipuzkoako Foru Aldundiak ez du Europaren babesik gai honetan”.  

Halaber, Oiarbidek kritikatu du Larraitz Ugarteren kudeaketa Bide-Azpiegituretako departamentuan: “Ugarteren kudeaketa kaxkarrak eraginak izan ditu, dagoeneko, gipuzkoarrongan, izan ere akats handiak egin ditu orain arte egindakoetan: 1) aurreikusitakoa baino 8.542.000 euro gehiago gastatu zituen 2012an errepideetako obretan zein mantentze-lanetan; 2) egun, Foru Aldundia egiten ari den lan bakarrak, hain zuzen ere, Deskargako tunelaren lanak, urtebeteko atzerapena du eta gain-kostuak oso handiak dira; eta 3) foru diputatuak berak egindako aurreikuspenek huts egin dute bidesarien diru-laguntzen programaren gainean eta, beraz, nahiz eta foru diputatuak diru-laguntzak urtean 1,2 milioi eurokoak esango zirela esan zuen, azkeneko datuek, ordea, diote momentuz 5 milioi euroak gaindituko direla. Gainera, egun, ez du azalpenik egin Batzar Nagusietan eta, ondorioz, gardentasun eza nabaria da”.   

Hori guztia dela eta, Aintzane Oiarbidek, honakoa salatu du: “Bilduk aurretik hausnartu gabeko erabakiak hartzen ditu eta, ondorioz, Gipuzkoa denbora eta dirua galtzen ari da. Izan ere, Larraitz Ugarte foru diputatuak bilatu du komunikabideetan idazpuru handiak jartzea, nahiz eta bere ideiak zehatzak ez izan. Eta, bitartean, legealdi erdia igaro da eta atzerriko kamioilariek Gipuzkoa zeharkatzen dute ezer ordaindu gabe. Beraz, gipuzkoarrok ordaintzen ditugu errepideen mantentze-lanak”.  

Azkenik, Oiarbidek Larraitz Ugarteri eskatu dio, jarrera aldatzeko; proposamena behingoz aurkezteko; gainerako erakundeekin – Iparraldekoak barne – elkarlanean aritzeko; eta adosteko gainerako alderdi politikoekin Gipuzkoako errepideak finantzatzeko modu egokiena.

No hay comentarios:

Publicar un comentario