EAJ-PNV-K SALATU DU, BILDUK EZ DITUELA BATZAR NAGUSIETAKO MOZIOAK BETETZEN ETA, BERAZ, EZ DUELA EZ KULTURA POLITIKORIK, EZ DEMOKRATIKORIK

Jeltzaleen batzarkide taldearen bozeramaile Markel Olanok esan du, Bilduren aginteko Foru Aldundiak agerian utzi du isolatuta dagoela, izan ere ez du komunikaziorik gainerako Gipuzkoako alderdi politikoekin. 

Ikasturte politikoaren hasieran, EAJ-PNVk 97 babes eskarera egin dizkio Gipuzkoako Batzar Nagusietako Mahaiari, izan ere, Bilduren aginteko Foru Aldundiak ez ditu betetzen Batzar Nagusien gehiengoak adostutakoak. Markel Olano jeltzaleen batzarkide taldearen bozeramailearen ustez, ezhoikoa da oposizioko alderdi batek babesa eskatzeko helegiteak egin behar izana, Foru Aldundiak ebazpenak betetzen ez dituelako. Gainera, gero eta gehiago dira Bilduren aginteko Foru Aldundiak betetzen ez dituen ebazpenak: iaz EAJ-PNVk 15 babes eskaera egin zituen eta aurten, aldiz, jeltzaleek 97 egin dituzte.

Horren harira, Olanok salatu du, Bilduk ez duela ez kultura politikorik ez demokratikorik: “Bilduk Batzar Nagusiak aintzat hartzen ditu soilik interesa duenean. Baina bere iritziaren kontrako erabakiak hartzen dituztenean Bilduk bizkar ematen die Batzar Nagusiei zein gipuzkoarron ordezkariei”.

Era berean, EAJ-PNV batzarkide taldearen eledunak honakoa esan du: “Nabaria da Bilduren aginteko Foru Aldundiaren eraginkortasun eza, izan ere ez ditu errespetatzen Batzar Nagusietan hartutako erabakiak. Bilduk Batzar Nagusiei kasu egiten die bakarrik gehiengoa duenean; baina aitzitik, bere proposamenak adosteko babesik ez duenean, Batzar Nagusien aurka egiten du eta, hori, onartezina da”.

Halaber, Markel Olanok segidakoa azaldu du: “Batzar Nagusietako araudiak 162.2 artikuluan honakoa dio: Foru Aldundiak mozio baten gaineko informaziorik ematen ez duenean, batzarkide taldeek eskubidea dute eskatzeko gaia hurrengo osoko bilkurako gai zerrendan sartzeko eta, horrenbestez, Foru Aldundia derrigortuko dute ebazpen horri buruzko azalpenak ematera”.

Azkenik, jeltzaleen batzarkide taldearen bozeramailearen iritziz, Bilduren aginteko Foru Aldundiak agerian utzi du isolatuta dagoela, izan ere ez du komunikaziorik gainerako Gipuzkoako alderdi politikoekin, ezta lurraldearen gizartearen eta ekonomiaren eragileekin ere. Beraz, Bilduren jarrera oso larria da eta, are gehiago, egun elkarrizketa, erakundeekiko errespetua eta adostasunak betetzea inoiz baino beharrezkoak direnean.