EAJ-PNV-REN USTEZ, ERREPIDEAK FINANTZATZEKO ARKUPE-SISTEMAK EZ DU BERMATZEN ATZERRIKO KAMIOIEK ORDAINTZEA ERREPIDEAK ERABILTZEAGATIK

Jeltzaleen batzarkide Aintzane Oiarbideren iritziz, Bilduren aginteko Foru Aldundiak aurkeztutako errepideak finantzatzeko sistemak akats ugari ditu.

Mugikortasuneko eta Bide Azpiegituretako foru diputatu Larraitz Ugartek eta Foru Aldundiaren teknikariek arkupe-sistema aurkeztu dute Batzar Nagusietan, hain zuzen, Foru Aldundiak Gipuzkoako errepideen mantentze-lanak finantzatzeko proposatu duen sistema. EAJ-PNVren batzarkide Aintzane Oiarbideren iritziz, Mugikortasun eta Bide-Azpiegituretako foru diputatuak ez du bere hitzaldian ezta behin ere aipatu, arkupe-sistema ezartzeko helburua dela Bidegiren inbertsioari aurre egitea – gogoan izan Bilduren aginteko Foru Aldundiaren goiburua hori izan dela agintea hartu zuenetik –, baizik eta, uneoro esan du, arkupe-sistema Gipuzkoako errepideen mantentze-lanak ordaintzeko dela. 

Horren harira, Foru Aldundiak Batzar Nagusietan aurkeztutako ereduari buruz, Oiarbidek honakoa esan du: “Ereduak akats ugari ditu eta, era berean, oso garestia da arkuak jartzea, arkuak kudeatzea eta arkuen mantentze-lanak egitea. Gainera, ereduak ez du argitzen nola ordainaraziko zaien Gipuzkoa ordaindu gabe zeharkatuko duten ibilgailuei”. Horrenbestez, EAJ-PNVren batzarkideak gogoratu du, hasieratik jeltzaleen helburua izan dela atzerriko kamioek ordainaraztea Gipuzkoa zeharkatzeagatik, errepideen mantentze-lanen kostuari aurre egiteko. Baina aitzitik, EAJ-PNVren ustez, arkupe-sistemak ez du bermatzen atzerriko kamioiek ordaintzea errepideak erabiltzeagatik.

Era berean, jeltzaleen hautetsiak arkupe-sistemaren bideragarritasunari buruzko EAJ-PNVren zalantzak azaldu ditu: “Arkupe-sistemaren kudeatzeak oso zaila izan behar du. Beraz, ezinbestekoa da jakitea zenbateko kostua izango duen sistema kudeatzeko behar diren lan-taldea eta baliabideak”.

Aintzane Oiarbidek, halaber, segidakoa adierazi du: “Ados gaude Europar Batasunaren iritziarekin, alegia, errepideak erabiltzeagatik ordaindu behar izatearekin. Horiek horrela, beti izan da EAJ-PNVren helburua Gipuzkoa zeharkatzen duten atzerriko kaimioilariei ordainaraztea. Izan ere, trafiko mota horrek ez dio Gipuzkoari etekinik ematen eta, aldiz, errepideak erabiltzen ditu eta ez du ordaintzen mantentze-lanak egiteko. Hala ere, gai honen gainean badago zalantza gehiago: baldin eta arkupeetatik pasatzeko gailuak zerbitzuguneetan erosi behar badira, nola bermatuko da atzerriko gidari horiek geldituko direla – esaterako, Irunen edo Behobian – eta gailua erosiko dutela 45minutuko edo 80 kilometroko ibilbidea egiteko?”.  

Azkenik, Oiarbidek Larraitz Ugarte Mugikortasun eta Bide-Azpiegituretako foru diputatuari eskatu dio, argitzeko, lehenik, zein fasetan dagoen Ibilgailu Astunen gaineko Foru Araua; bigarrenik, Ibilgailu Arinen gaineko Foru Araua egiteko asmorik duen; eta, azkenik, N-I errepidea konponduko duen arkupe-sistema edo adosten den sistema jarri aurretik”.