EAJ-PNV-K BILDURI ESKATU DIO INBIOMED-I BIZKAR EZ EMATEKO ETA BATZAR NAGUSIETAN ONARTUTAKOA BETETZEKO

Jeltzaleen batzarkide-taldearen bozeramaile Markel Olanok aditzera eman du, EAJ-PNVk presako proposamena egin duela  Foru Aldundiak Inbiomedi 400.000 euro emateko, hain zuzen ere, defizitaren banaketaren 18 milioi euroen gaineko Foru Arauan onartutako diru-laguntza 2013ko abenduaren 13a baino lehen emateko. 

EAJ-PNVren batzarkide taldeak presako proposamena egin du Gipuzkoako Batzar Nagusietan. Bertan, jeltzaleek Foru Aldundiari eskatu diote, 2013ko abenduaren 31a baino lehen Inbiomedi 400.000 euro emateko, hain zuzen ere, defizitaren banaketaren 18 milioi euroen gaineko Foru Arauan onartutakoa emateko. EAJ-PNV batzarkide taldearen bozeramaile Markel Olanok Bilduri eskatu dio, Inbiomedi bizkar ez emateko. Horren harira, segidakoa gogoratu du: “Bilduren aginteko Foru Aldundiaren bozeramaile Larraitz Ugartek adierazpen kezkagarriak egin zituen Inbiomedi buruz. Ugartek esan zuen, Foru Aldundia prest dagoela, orain, Inbiomedi 150.000 euroko diru-laguntza emateko eta beste 250.000 euro emango dizkiola baldin eta erakundeen arteko akordioa lortzen bada. Jarrera horrek ez du bat egiten Eusko Jaurlaritzaren erabakiarekin, hau da, Inbiomedi 2013ko abenduaren 31a baino lehen 400.000 euro emateko erabakiarekin”.   

Era berean, Olanok honakoa esan du: “Inbiomeden egoera oso larria da, beraz, beharrezkoa da lehenbailehen 400.000 euroko diru-laguntza ematea, hain zuzen ere, Bildu eta EAJ-PNV alderdiek adostutako 18 milioi euroko foru dekretua onartzeko akordioa betetzeko laguntza ematea”. Halaber, EAJ-PNVren bozeramaileak gogoratu du, sinatutako akordioari esker Foru Araua onartu zela eta, ondorioz, Foru Aldundiak derrigorrez onartutakoa bete behar duela. Hori dela eta, Markel Olanoren iritziz, onartezina da Foru Aldundiaren jarrera eta, beraz, EAJ-PNVk presako proposamena egin duela Batzar Nagusietan, Bilduren aginteko Foru Aldundiak jarrera aldatzeko; izan ere, Bildu ez da EAJ-PNVrekin sinatutako hitzarmena betetzen ari.    

Azkenik, Markel Olanok Bilduri eskatu dio, Batzar Nagusietan onartutakoa betetzeko eta bere jarrera aldatzeko. Izan ere, onartezina da, alde batetik, Bildu gainerako erakundeekiko jarrera oldarkorra izatea eta Inbiomedekin konpromiso handiagoa izateko eskatzea; eta bestetik, Bilduk erabakitzea Batzar Nagusietan Foru Arau baten bidez onartutako ekarpena baldintzatzea eta gutxitzea.