EAJ-PNV-K SALATU DU BILDUREN FORU GOBERNUAK ARAUDI-EGUTEGIA EGIN GABE JARRAITZEN DUELA.

Batzarkide jeltzale Eider Mendozak gogorarazi du, araudi-egutegia ezinbestekoa dela foru gobernuak arauen plangintza egiteko eta Batzar Nagusiek kontrol lana egiteko.

EAJ-PNVren batzarkide taldeak gaur goizean salatu du Bilduk ez duela oraindik egin araudi-egutegia, hain zuzen ere, Foru Aldundiaren legealdi osorako aurreikuspena jasotzen duen araudi-egutegia. Horren harira, EAJ-PNVren batzarkide Eider Mendozak honakoa esan du: “Bi urte eta erdi pasa dira Bilduk Foru Aldundiaren agintea hartu zuenetik eta, oraindik, ez dugu bere araudi-aurreikuspenik legealdi osorako, nahiz eta behin eta berriro egiteko eskatu diogun, mozioez eta ebazpen proposamenez baliatuz”.

Horiek horrela, Mendozak gogorarazi du, araudi-egutegia ezinbestekoa dela foru gobernuarentzat, arauen plangintza egiteko, eta Batzar Nagusientzat, kontrol lana egiteko. Hortaz, EAJ-PNVren batzarkideak segidakoa azaldu du: “EAJ-PNVk behin eta berriro foru gobernuari eskatu dio foru arauen gaineko araudi-egutegia egiteko eta, bertan, zehazteko legealdian zehar egingo dituen foru arauen datak. Baina aitzitik, gaur jaso dugu Bilduren aginteko Foru Aldundiaren azkeneko araudi-egutegi proposamena eta, bertan, egingo dituen arauen zerrenda dago, baina daten arrastorik ez. Beraz, hori ez da araudi-egutegia, baizik eta zerrenda bat”.

Era berean, batzarkide jeltzaleak gogorarazi du, legealdia hasi zenean, 2011ko urrian, EAJ-PNVk Bilduren foru gobernuari eskatu ziola foru arau proiektuen araudi-egutegia egiteko; baina aitzitik, Bilduk ez zuen kasurik egin.  Horrenbestez, Eider Mendozak segidakoa azaldu du: “2012ko Politika Orokorreko osoko bilkuran, Batzar Nagusiek Foru Aldundiari eskatu zioten 2012ko urria baino lehen araudi-egutegia egiteko. Foru Aldundiak 2012ko abenduan erantzun zuen, baina batzarkide taldeei igorri zien informazioan ez zeuden Bilduk hartutako konpromisoak.”.  

Azkenik, hona hemen hautetsi jeltzalearen hitzak: “2013ko Politika Orokorreko osoko bilkuran Batzar Nagusiek Foru Aldundiari eskatu zioten, beste behin, legealdi osorako araudi-egutegia egiteko, EAJ-PNVren ekimenez. Behin eskaria egin eta bi haliabete igarota, Foru Aldundiak foru arauen zerrenda bidali du eta ez, ordea, legealdiaren hasieratik eskatu diogun araudi-egutegia. Beraz, Bilduren foru gobernuak jarrera harroputza du, hain zuzen, gipuzkoarron interesen alde egiteko erakunde batek eduki behar ez duen jarrera”. Hori guztia dela eta, Mendozak aditzera eman du, EAJ-PNVren batzarkide taldeak interpelazioa egingo duela Foru Aldundiaren jarrera gaitzesteko eta, ondorioz, jarrera hori lehenbailehen aldatzeko.