EAJ-PNV-REN USTEZ, GARDENTASUNARI BURUZKO FORU ARAUAK BILDUREN AGINTEKO FORU ALDUNDIAREN GARDENTASUN EZAREKIN AMAITUKO DU

Batzarkide jeltzale Xabier Ezeizabarrenak gogorarazi du, gardena izatea dela foru gobernuak epean erantzutea, erantzuna egokia izatea eta agerraldiak ahalik eta azkarren egitea.

Gipuzkoako Batzar Nagusiek Gardentasunari eta informazio publikoa eskuratzeari buruzko Foru Araua onartu dute. EAJ-PNVren batzarkide Xabier Ezeizabarrena pozik dago onartutako Foru Arauarekin eta honakoa esan du: “Gardentasunari eta informazio publikoa eskuratzeari buruzko Foru Araua beharrezkoa zen eta segidakoa bermatuko du: herritarren eskubide unibertsal batzuk betetzea”. Dena den, Ezeizabarrenak Bilduren aginteko Foru Aldundiari eskatu dio bere buruari ere kritika egiteko eta araua zorrotz betetzeko. Horren harira, batzarkide jeltzaleak gogorarazi du, gardentasuna pertsonen eskubide subjetiboa del aeta Foru Aldundia behartuta dagoela, gainerako erakunde publikoak bezala, informazioa ematera. Beraz, Xabier Ezeizabarrenaren ustez, gardentasunari buruzko Foru Arauak Bilduren aginteko Foru Aldundiaren gardentasun ezarekin amaituko du.

Era berean, Xabier Ezeizabarrenak honakoa adierazi du: “Gardentasunari buruzko Foru Araua herritarrek behin eta berriro eskatutako foru araua da, izan ere, herritar guztiok informazio publikoa gure esku izateko aukera izango dugu”. Hala ere, Ezeizabarrenak Bilduren aginteko foru gobernuari eskatu dio, batzarkide taldeei informazioa bidaltzeko, informazio publikoa bermatzeko egingo den web gune berrian jarri baino lehen. Hortaz, EAJ-PNVren batzarkideak gogorarazi du, gardena izatea ere dela foru gobernuak epean erantzutea, betiere, batzarkide taldeek bere lana egoki egiteko.

Jeltzaleen hautetsiak, halaber, segidakoa esan du: “Ikusi beharko dugu Foru Aldundiak nola ezartzen duen arau berria. Izan ere, orain arte, ez ditu bete edo guztiz bete Batzar Nagusietan onartutako hainbat foru arau”. Horrenbestez, Xabier Ezeizabarrenak Bilduren aginteko foru gobernuari eskatu dio, foru araua betetzen dela bermatzeko, betiere, gardentasunaren erronka lortzeko.

Azkenik, hona Ezeizabarrenaren hitzak: “Gardentasunari eta informazio publikoa eskuratzeari buruzko Foru Arauak bat egiten du Europako Batasunean onartutako hainbat araurekin. Gainera, Europako Batasunaren araudietan ere kargu politikoek kode etikoa bete beharko dute. Beraz, foru arauak eragina du Gipuzkoako administrazio publiko osoan, baita Gipuzkoako Batzar Nagusietan ere”. Horiek horrela, Xabier Ezeizabarrenak gogorarazi du, gardena izatea dela foru gobernuak epean erantzutea, erantzuna egokia izatea eta agerraldiak ahalik eta azkarren egitea.