EAJ-PNV-K ESAN DU URTETIK URTERA BIDEGIREN KAUDIMENA SENDOTZEN ARI DELA

Batzarkide jeltzale Joseba Antxustegik salatu du, Larraitz Ugartek ez duela jarrera aldatu, nahiz eta Bidegiren kaudimena agerikoa den.

Mugikortasuneko eta Bide Azpiegituretako foru diputatu Larraitz Ugartek izen bereko batzordean parte hartu du gaur goziean Gipuzkoako Batzar Nagusietan. Bertan, Bidegi foru sozietatearen 2015eko aurrekontua aurkeztu du. Behin batzordea amaituta, EAJ-PNVren batzarkide Joseba Antxustegik honakoa adierazi du: “Bidegiren kaudimena sendotzen ari da, izan ere, kontu-ikuskaritzaren datuen arabera Bidegiren kutxan abuztuaren 31n 107,7 milioi euro zeuden, behin zor guztiei aurre eginda”. Horrenbestez, Antxustegik salatu du, Larraitz Ugartek ez duela jarrera aldatu, nahiz eta Bidegiren kaudimena agerikoa den.

Bidegi foru sozietatearen benetako bilakaerak baztertu ditu Larraitz Ugarte foru diputatuaren aurreikuspen alarmista guztiak, hain zuzen ere, Bidegiko lehendakari denetik egin izan dituen aurreikuspen alarmistak. Izan ere, 2013ko foru sozietatearen aurrekontuan 16,7 milioi euroko galera aurreikusi zuen; baina aitzitik, kontu-ikuskaritzak aurreikuspen oker hori baztertu zuen eta esan zuen ustiapenaren emaitza positiboa izan zela (hain zuzen ere, 18,6 milioi euro). 2014ean aldiz, segidako aurreikuspenak egin zituen Ugartek: lehenik, trafikoa %º1 handituko zela esan zuen; bigarrenik, bidesarien diru-bilketa %3,5 handituko zela, eta azkenik, ustiapenaren emaitza 22,6 milioikoa izango zela. Baina errealitatea bestelakoa da: 2014ko lehenengo 8 hilabeteetan, ustiapenaren emaitza 21,7 milioi eurokoa izan da eta emaitzaren arrazoia izan da trafikoa %1 baino gehiago handitu dela. Beraz, ez litzateke harrigarria izango azken emaitza aurreikusitakoa baino 6 milioi euro gehiagokoa izatea.

Horren harira, Antxustegik Larraitz Ugarteri segidakoa leporatu dio: “Aurreikuspenak  ez dira fidagarriak eta sinestezinak dira eta, gainera, ez dira argiak eta zehatzak. Era berean, diru-bilketaren gaineko datuak ez dira benetakoak eta beti alarmistak dira, nahiz eta Larraitz Ugartek horretarako arrazoirik ez duen. Horrenbestez, foru diputatuak urtetik urtera aditzera ematen du arazoak egongo direla zorrari aurre egiteko. Beraz, nahiz eta datuek Larraitz Ugarteri arrazoia kentzen dioten, ulertezina da legealdiaren amaieran esaten jarraitzea foru sozietateak ekonomia-arazoak dituela. Horrek agerian uzten du Larraitz Ugarteren helburu bakarra honakoa dela: lehengo legealdiko EAJ-PNVren aginteko foru gobernuaren aurka egitea, Larraitz Ugarte beraren akordioak egiteko gaitasun eza ezkutatzeko”.

Era berean, Joseba Antxustegiren ustez, Larraitz Ugartek Bidegi ondo kudeatzen saiatu beharko luke, baina hori egin beharrean, Bidegi erabili nahi izan du aurkari politikoaren aurka egiteko, hain zuzen ere, EAJ-PNVren aurka.

EAJ-PNVren batzarkideak, halaber, honakoa salatu du: “Ezin da proposatu 2015eko aurrekontuan ustiapen emaitza 29,9 milioi eurokoa izatea eta, diru-sarreren aurreikuspena lotzea trafikoa %1,92 handitzera eta bidesarien diru-bilketa %3,5 handitzera. Izan ere, horiek izan daitezke 2014ko azken emaitzak. Gainera, baldin eta ustiapen emaitza horri amortizazioen gaineko 37,6 milioiak gehitzen badizkiogu 67,6 milioi euro egongo dira urteko 64,8 milioi euroko amortizazioari aurre egiteko. Beraz, faltsua da Foru Aldundia behartuta dagoela 8,9 milioi euro jartzera zorrari aurre egiteko, izan ere, Bidegi foru sozietate publikoa kaudimenduna da”.

Azkenik, hona hemen Antxustegiren hitzak: “Larraitz Ugarte ez da gardena izan Bidegi kudeatzeko. Izan ere, ez ditu Bidegiren 2014ko kontuak egoki argitu: azaroaren erdian gaude eta, oraindik, ez du irailaren datuen berri eman. Eta gainera, oraindik ez dugu ezagutzen Bidegiren eta Bidelanen arteko akordioa, hain zuzen ere, foru diputatuak berak bolo bolo komunikabideetan iragarri zuen akordioa, izan ere, Batzar Nagusietako gainerako taldeoi ez digu akordioaren berri eman”.